ಲೇಖನ- ನೀನೊಂದು ಮುಗಿಯದ ಮೌನ

(@)(@)(@)

(@()@)
ನೀನೊಂದು ಮುಗಿಯದ ಮೌನ,
ನಾ ಹೇಗೆ ತಲುಪಲಿ‌ ನಿನ್ನ..
ನೀನೊಂದು ಕಡಲಿನ ಧ್ಯಾನ
ನಾ ಹೇಗೆ ಬೆರೆಯಲಿ ನಿನ್ನ..

ನಿಜ ನೀ ನನಗೆ ಅರ್ಥವಾಗುತ್ತಲೇ ಇಲ್ಲ. ನೀನು ಹೀಗೇ.. ಎಂದು ಕೊಂಡರೆ ಹಾಗಿರುವುದಿಲ್ಲ. ಹೀಗಲ್ಲ ಎಂದೆನಿಸಿದರೆ ಹಾಗೆ ಬದಲಾಗಿರುತ್ತೀ. ಹೀಗೆ ಹಾಗೇ ಅಯ್ಯೋ..!! ನನ್ನ ಮನಸ್ಸನ್ನು ಗೊಂದಲದ ಗೂಡಾಗಿಸಿ ಬಿಟ್ಟೆ  ನೋಡು. ನಿನ್ನ ಜೊತೆ ಮಾತನಾಡಬೇಕು ನಾಲ್ಕು ಹೆಜ್ಜೆ ಕೈಕೈ ಹಿಡಿದು ನಡೆಯಬೇಕು, ನಿನ್ನ ಪ್ರೀತಿಯ ನಿನ್ನ ಬಾಯಿಯಿಂದಲೇ ಕೇಳಿಸಿಕೊಳ್ಳಬೇಕು, ನಿನ್ನ ತರಲೆ,ತುಂಟತನವನ್ನು ಅನುಭವಿಸಬೇಕು.. ಏನೆಲ್ಲ ಕನಸುಗಳು. ನಿನ್ನ ನೋಡಿದ ಮೊದಲ ದಿನದಿಂದ ಇಂದಿನ ವರೆಗೂ ಕನಸುಗಳ ಪಟ್ಟಿ ಬೆಳೆಯುತ್ತಲೇ ಇದೆ.ಆದರೆ ನೀನು ಮಾತ್ರ ಕೈಗೆ ಸಿಗದ ಅಂಬರಕೆ ಚಾಚಿದ ಕುಸುಮವಾದೆ. ಹುಣ್ಣಿಮೆಗೆ ಬಂದು ಮನ ತಣಿಸುವ ಅಮವಾಸ್ಯೆಗೆ ಮಾಯವಾಗುವ ಚಂದಿರನಾದೆ. ನನ್ನ ಪ್ರೀತಿಯ ಪರಿಯ ಹೇಳಿಕೊಳ್ಳಲು ಆತುರವಿದೆ.. ನಿನ್ನೊಂದಿಗೆ ಬೆರೆಯಲು ಕಾತುರವಿದೆ. ಆದರೆ ನಿನಗೆ ಸಮಯವೇ ಇಲ್ಲ. ಅದೊಂದೇ ಕಾರಣ ನೀನನಗೆ ನೀಡುವುದು.. ನಿನ್ನ ಮೇಲೆ ರೇಗಾಡಬೇಕು ಎಂದೆನಿಸುತ್ತದೆ.. ನೀ ಸನಿಹವಿಲ್ಲ. ನನ್ನ ಕೋಪ ತಣಿಸಲು ನೀ ತೊಡೆಯ ಮೇಲೆ ಮಲಗಿಸಿಕೊಂಡು ತಲೆ ಸವರಬೇಕು ಎಂದೆನಿಸುತ್ತದೆ, ನೀ ಸನಿಹವಿಲ್ಲ.. ದೂರದೂರದಲೇ ವಿರಹಬೇಗೆಯಿಂದ ಸುಡುತಿದೆ ಒಡಲು. ಪ್ರೀತಿ ಎಂದರೆ ಹೀಗೇನಾ.. ಎಲ್ಲರೂ ಪಾರ್ಕು, ಬೀಚು ಎಂದು ಸುತ್ತುತ್ತಾರೆ? ನಮಗೇಕೆ ಸಾಧ್ಯವಿಲ್ಲ. ಭ್ರಮೆಯೋ ಕಲ್ಪನಾಲೋಕದಲ್ಲೋ ಸ್ವಚ್ಛಂದವಾಗಿ ವಿಹರಿಸುತ್ತಿರುತ್ತಾರೆ, ನಮಗೇಕೆ ಸಾಧ್ಯವಾಗುತ್ತಿಲ್ಲ.. ನಾನೊಂದು ಕಡೆ, ನೀ'ನೊಂದು' ಕಡೆ ಜೋಡಿ ಹಕ್ಕಿಗಳು ಒಂದೇ ಗೂಡಿನಲಿ ಜೊತೆಯಾಗುವುದಿ ಯಾವಾಗ? ಬೇಡ ಅದೆಲ್ಲ ಬೇಡ ಬಿಡು. ಸಾಧ್ಯವಾಗದ ಕನಸು. ಕಲ್ಪನೆಗಳಿಗೆ ಜೀವ ನೀಡಲು ನಮ್ಮಿಬ್ಬರಿಗೂ ಸಾಧ್ಯವಿಲ್ಲ. ಆದರೆ ದಿನಕ್ಕೆ ಒಮ್ಮೆಯಾದರೂ ಮಾತನಾಡಲು ಏನಾಗಬೇಕು? ಅದೂ ನಿನ್ನಿಂದ ಸಾಧ್ಯವಿಲ್ಲವೇ? ನೀ ಹೀಗೆ ದೂರದೂರ ಸರಿದರೆ ನನಗೇಕೋ ಅಂಜಿಕೆ , 'ಅಳು'ಕು ಎಲ್ಲವೂ. ಮನಸ್ಸು ನೀರಿನಲ್ಲಿ ಅದ್ದಿತೆಗೆದ ಸ್ಪಾಂಜಿನಂತೆ ಆಗುತ್ತದೆ. ಈ ಒದ್ದಾಟ ನನ್ನನೇ ಕುಗ್ಗಿಸುತ್ತಿದೆ. ಬೇರೆ ಯಾರೂ ಬೇಡ ಅನ್ನಿಸುತ್ತಿದೆ. ಮನದಲ್ಲಿ ಇಷ್ಟು ನೋವ ಇಟ್ಟುಕೊಂಡು ಈ ಪ್ರಪಂಚದೆದುರು ನಗುವಿನ ಮುಖವಾಡ ತೊಟ್ಟು ಜೀವಿಸಲು ಇಷ್ಟವಾಗುತ್ತಿಲ್ಲ. ಎಲ್ಲರಿಂದ ಒಂದಷ್ಟು ದೂರವಿರುವ ಆಸೆ. ಅದು ನನ್ನಿಂದ ಮಾತ್ರ ಸಾಧ್ಯ. ನೀ ಸುಖಿಯಾಗಿರು. ಬಿಡುವಾದರೆ ಮಾತನಾಡಬೇಕನಿಸಿದರೆ ತುಟಿಗೆ ಹಾಕಿದ ಬೀಗ ತೆಗಿ.. ಎಲ್ಲರಿಗೂ ಸಮಯದ ಅಭಾವವಿರುತ್ತದೆ. ಆದರೆ ಪ್ರೀತಿಪಾತ್ರರಿಗೆಂದೇ ನಮ್ಮವರಿಗೆಂದೇ ಹೊಂದಿಸಿಕೊಳ್ಳುವುದು ಒಂದು ಕಲೆ. ಕಾರಣ ಅವರು ನಮಗಾಗೇ ಉಸಿರಾಡುತ್ತಿರುತ್ತಾರೆ.. ನಮ್ಮ ಒಳಿತಿಗಾಗೇ ಬೇಡುತ್ತಿರುತ್ತಾರೆ. ನಮಗಾಗೇ ಕೊರಗುತ್ತಾ ಸೊರಗುತ್ತಿರುತ್ತಾರೆ. ಇದನ್ನ ಅರ್ಥಮಾಡಿಕೊಳ್ಳುವುದು ನಮಗೇ ಬಿಟ್ಟಿದ್ದು..

- ಸಿಂಧುಭಾರ್ಗವ್.