ಲೇಖನ : ಅಮ್ಮ ಎಂದಾಗ

ಅಮ್ಮ ಎಂದಾಗ... ಲೇಖನ

ಲೇಖನ: ಅಮ್ಮ ಎಂದಾಗ...
.
.
ಅಮ್ಮ ಎಂದರೆ ಹರುಷ ನೂರ್ಮಡಿಯಾಗುವುದು. ಗರ್ಭಕೊಳದಲ್ಲಿ ಮತ್ಸ್ಯವಾಗಿ ವಿಹರಿಸುತ್ತಿದ್ದ ನಮಗೆ ಅದೇ ಒಂದು ಪರಪಂಚವಾಗಿತ್ತು. ಹಡೆದು ಭೂಮಿತಾಯಿಯ ಮಡಿಲಿಗಿಟ್ಟು ಇನ್ನೊಂದು ಪ್ರಪಂಚವ ಪರಿಚಯಿಸಿಕೊಟ್ಟ ಮಹಾತಾಯಿ ಆಕೆ. ನವಮಾಸವೂ ನೋವ ನುಂಗಿಕೊಂಡು , ಕನಸ ಕಟ್ಟಿಕೊಂಡು ತನ್ನ ಆಸೆ ಆಕಾಂಕ್ಷೆಗಳ ಮೆಲುದನಿಯಲ್ಲಿ ಭ್ರೂಣಕ್ಕೆ ತಿಳಿಸಿ ಮೊಟ್ಟಮೊದಲ ಸಂವಹನ ನಡೆಸಿದವಳು ಆಕೆ‌. ಬಗೆಬಗೆಯ ತಿಂಡಿ ತಿನಿಸುಗಳ "ಬಯಕೆ" ಎಂಬ ಹೆಸರಿನಲ್ಲಿ ತಿಂದು ತನ್ನ ಗರ್ಭದೊಳಗಿರುವ ಕುಡಿಗೂ ಉಣಿಸಿದವಳು ಆಕೆ. ಈ ಜನುಮವೇ ಆಕೆ ನಮಗೆ ನೀಡಿದ ವರದಾನವಾಗಿದೆ. ನಡೆದಾಡುವ ದೇವರು ಎನ್ನಿಸಿಕೊಳ್ಳುವುದು ಅಷ್ಟು ಸುಲಭವಲ್ಲ. ತನ್ನ ಅಭಿರುಚಿಗಳ ಬದಿಗೊತ್ತಿ ಕೇವಲ ಮಗುವಿನೊಂದಿಗೆ ಹೊಸದೊಂದು ಪುಟ್ಟಪ್ರಪಂಚವನ್ನು ಸೃಷ್ಟಿಸಿಕೊಂಡು ಬದುಕು ಕಟ್ಟಿಕೊಳ್ಳುವವಳು ಆಕೆ. ಗಂಡ ಉದ್ಯೋಗದಲ್ಲಿ ತಲ್ಲೀನನಾದರೆ ತಾಯಿ ಮಗುವಿನ ಲಾಲನೆ ಪಾಲನೆಯಲ್ಲಿ ತನ್ಮಯಳಾಗಿರುತ್ತಾಳೆ. ತಾಯಿ ಬಳ್ಳಿಯ ಹೂವುಗಳಾಗಿ ಅರಳಿದ ನಮಗೆ ಈಗ ಸಂತೃಪ್ತಿಯ ಜೀವನ ನಡೆಸುವುದೊಂದೇ ದಾರಿ. ರಭಸದಿ ಹರಿಯುವ ಅದೆಷ್ಟೋ ನದಿಗಳಿದ್ದರೂ ಶಾಂತವಾಗಿರುವ ಸರೋವರಗಳ ಸಂಖ್ಯೆ ತೀರ ಕಡಿಮೆ. ಅದಕ್ಕೆ ತಾನೆ, ತಾಯಿಯನ್ನು ಸರೋವರಕ್ಕೆ ಹೋಲಿಸುವುದು. ಸಹನೆ, ತಾಳ್ಮೆಯ ಮೂರುತಿ ಆಕೆ.

ಗಂಡನ ಪ್ರೀತಿಯ ಜೊತೆಗೆ ಬಾಳಲು ಬಯಸುವ ಆಕೆಗೆ ಮಕ್ಕಳು ಒಂದು ಬದುಕು ಕಟ್ಟಿಕೊಳ್ಳುವ ತನಕ ನೆಮ್ಮದಿಯಿರುವುದಿಲ್ಲ. ಯಾವಾಗಲೂ ಸಕಾರಾತ್ಮಕವಾಗಿ   ಚಿಂತಿಸುವ ಅಮ್ಮ, ಮಕ್ಕಳಿಹೆ ಅದೂ ಹೆಣ್ಮಕ್ಕಳಿಗೆ ಅವರ ಗಂಡನ ಮನೆಯಲ್ಲಿ ಸದಾ ಧೈರ್ಯದಿಂದ ಇರಬೇಕು ಎಂದು ಸ್ಪೂರ್ತಿ ನೀಡುತ್ತಾಳೆ. ಹೆಣ್ಮಕ್ಕಳಿಗೆ ಮದುವೆ ಮಾಡಿಸಿ ಕಳುಹಿಸುವಾಗ ಅಳುವ ಅಮ್ಮ, ತಾನು ಈ ಮನೆಗೆ ಸೊಸೆಯಾಗಿ ಬಂದ ದಿನಗಳನ್ನು ನೆನೆಸಿ ಮೌನವಹಿಸುತ್ತಾಳೆ. ಮದುವೆಯ ಹೊಸತರಲ್ಲಿ ಮಗಳು ಗಂಡ, ಗಂಡನ‌ಮನೆಯವರ ಜೊತೆ ಹೇಗೆ ಹೊಂದಿಕೊಂಡು ಹೋಗುತ್ತಾಳೋ ಎಂಬುವುದೇ ಒಂದು ಚಿಂತೆ ಅವಳಿಗೆ ಕಾಡುತ್ತಿರುತ್ತದೆ. ಗಂಡನ ಮನೆಯಿಂದ ಯಾವ ದೂರು ಬರಬಾರದು ಎಂಬುದೇ ಅವಳ ಆಸೆಯಾಗಿರುತ್ತದೆ.  ಹಾಗೆಯೇ ಮಗನಿಗೆ ಸೊಸೆಯನ್ನು ತಂದುಕೊಳ್ಳುವಾಗಲೂ ತುಂಬಾ ಜಾಗರೂಕಳಾಗಿ ಆಯ್ಕೆ ಮಾಡಲು ಹೋಗುತ್ತಾಳೆ.  ನಮ್ಮನ್ನು ಆರೈಕೆ ಮಾಡದಿದ್ದರೂ ಪರವಾಗಿಲ್ಲ ಮಗನ ಮನಸ್ಸಿಗೆ ನೋಯಿಸದಿರಲಿ ಎಂಬುವುದೇ ಅವಳ ಬಯಕೆಯಾಗಿರುತ್ತದೆ. ಇಷ್ಟು ದಿನ ನಾನು ನೋಡಿಕೊಂಡೆ, ಇನ್ನು ನಿನ್ನ ಜವಾಬ್ದಾರಿ ಎಂದು ಧಾರೆ ಎರೆಯುವ ಸಮಯದಲ್ಲೇ ಸೊಸೆಯನ್ನು ನೋಡಿ ಕಣ್ಣಿಂದಲೇ ಮಾಹಿತಿ ರವಾನಿಸುತ್ತಾಳೆ.
ನಿಜ. ಮಡದಿಯಾಗಿ ಯಾನಿ ಸೊಸೆಯಾಗಿ ಒಬ್ಬರ ಮನೆಗೆ ಬಂದ ಹೆಣ್ಣು ವರುಷದೊಳಗೆ ಶುಭಸಮಾಚಾರ ನೀಡಿ ತಾಯಿಯಾಗಿ ಬಿಡುತ್ತಾಳೆ. ಆ ತಾಯಿಯ ಪಾತ್ರ ನಿರ್ವಹಿಸಲು ಅವಳು ಸಂಪೂರ್ಣವಾಗಿ ತನ್ನ ಆಸೆ ಆಕಾಂಕ್ಷೆಗಳನ್ನು ತ್ಯಾಗ ಮಾಡಲೇಬೇಕಾಗುತ್ತದೆ. ಇಲ್ಲದಿರೆ ಸರಾಗವಾಗಿ ಸುಲಲಿತವಾಗಿ ಜೀವನ ನಡೆಯದು. ಎಲ್ಲ ತಾಯಿಯಂದಿರೂ ಸುಖಸಂತೋಷದಿಂದಿರಲಿ. ಅವರ ಆರೋಗ್ಯ ವೃದ್ಧಿಸಲಿ.
.
.
- ಸಿಂಧು ಭಾರ್ಗವ್ | ಬೆಂಗಳೂರು-೨೧

#happymothersday #kannadaarticle #article #momslove
MOMS love and care 💕
#Sindhubhargavquotes #ಅಮ್ಮಎಂದರೆ #ಅಮ್ಮನಪ್ರೀತಿ ಒಂದು #ಕನ್ನಡಲೇಖನ #ಪ್ರತಿನಿಧಿ_ದಿನಪತ್ರಿಕೆ ಯಲ್ಲಿ ಪ್ರಕಟವಾಗಿದೆ. #may102020 💞 #sundaynewspaper